Khuazei na kal hmanh ah na theih dingmi cu, "Nunnak hi a tawituk" timi chimrelnak hi a si. Hi nih hin zei sullam thengte dah a ngeih? Hi sullam cu nunnak hi a tawi caah hmanzia thiam usih; mah le mah lohtlaknak men ah caan hi hmang hlah usih, i daw usih, ti dahkaw a si. Kan nun hi aa lawmhnak hnga ding caah a hrampi kan chunglei nih hin thazaang a chuah lengmang a hau.
Cu bang chunglei thazaang hmuh khawhnak ding lam hna cu:
1. Nem tein mirh
Iang ngei ngai le rem ngai in na hun mirh paoh ahkhin um khua nuam. Um khua nuamh cu zei a si? Lungthin, ruahnak daihnak nih a hun dinhdaihternak te khi, a si. Nihin lungthin umtuning cawngtu nih cun hitin an ti: “Na mirhnak te nih hin na lungthin le ruahnak caah ṭhilṭha tamtuk a chuahpi.”
2. Kekzung in nihkheh
Chikhat caan ahhin: kan ni kho, i kan ṭap kho. Nih le ṭah cu nangmah ah aa hngatchan. Nihkhua chia chung zongah kekzung in nihkheh khawh a si. Nihkheh tuk le beibaham loin um hi hruhthil a lo tawn; cu lak ah, a cheu nih cun ngamdamnak an ti. Hruhthil menmen lawng an si tak lo, ngamdamnak zong an si taktak ve ko.
3. Lungputning chungin lunglawmhnak
Zeitluk in mi thluachuak na si hi philh hlah. Mi tampi nih cun zeitluk in mi vanṭha kan si le mi thluachuak kan si hi kan philh tawn. Minung nunnak ahhin kan lungput a biapi tuk. Thei zungzal, a lungput ṭha lomi nih lunglawmhnak an hmu bal lo. Cucaah cun, lungput ṭha ngeih izuam. Na lungput ṭha nih a pawimi lunglawmhnak nih an in cawm lai.
4. Vahvaih
Na umhar, lunglen, lungnuamh lo ti bantuk caan ahkhin khualeng ah vak ko. Dawr ah a si kho, dum ah a si kho, rili kam ah a si kho, silole innpa chaktlang sinah a si kho. Khi thil nih khin caan sau ca silo hmanh ah chikhat na retheihnak le thilrit cu an in chan ve.
5. Lungthin i hnihsaihnak tep ve
Zeimaw caan ahcun kan mah le kan lungthin i hnihsaihnak lila hmanh kan pheo tawn. Zuam tuk, duhtuk ve ko zongah--i uah ruang, i zohsang ruang tbk ahkhin kan hlohhlak men tawn hna. Khi nih khin thinlung caah zawtnak a chuah pi. Ziah tiah cun, thinlung kan hrem, i kan fahter.
6. Mah le mah i dawtnak ngei
Na celh lo tiang in zaan ah ṭhu hlah. Na remh khawh ti lo ding mi palhnak hrial i zuam. Mah le mah i niamternak lungthin kha hawi ah i ser hlah. Na pumsa hrawkkhotu thil din le ei i sum. Fak tukin rianṭuan hlah. Caan hman zia i thiam.
7. A tu caanṭha na ngeih mi hi upat
A tu caan le a tu thengte ahhin a si khawh chungin--lawmhnak ah siseh, nuamhnak ah siseh--tling khitkhat tein nun i zuam. Hnulei hmailei kong ah buaituk hlah."Science" le "Bible" tuaktan ning ahcun: “Minung ruahnak hi a vakvaimi a si i a vakvaimi ruahnak cu aa nuam lomi ruahnak a si.” Cucaah, hnu lei caan ah siseh, hmailei caan ah siseh, na ruahnak kha vahvaih ter tuk hlah, an in ei sual lai.
8. Na ri i hngal
Zeimaw caan ahcun nangmah le nangmah naa dirpi a hau. Midang kha na ri na theihter hna a biapi: zei tiang dah na in khawh i zei tiang dah na in khawh lomi te hna kong khi. Cun, nangmah le nangmah i hleng hlah. Hi hi mah le mah i dawtnak ngan ṭeng-nge pakhat, a si.
9. I ranh tuk hlah
Teima tein tuah. Rian ah heh chet i hnawh lennak cun, teima tein le lunglut tein naa rup tluk in na tuahṭuan kha a ṭha deuh. Cuti lo cun, nangmah le nangmah harnak naa pek, a si. Nangmah le nangmah naa thah a si. Na pum daw law na um khua nuam deuh ko lai.
10. Pangchia thil/minung hrial hna
Minung nih thinlung zei kan rel lo caan le kan pheo caan khi a um, i khihi pangchia minung timi cu an si. Khi bantuk minung khi na hrial hna hau. Na komh hna i an sinak naa hrawm ve ahcun lohtlaunak cu na ta, a si. Amah bel, harnak caan i an um caan ah va philh hna hlah. Bawmtu si i zuam.
11. Hawi sinah na caan hrawmh ve
Thil pakhat khat na tuah mi kong; na hlawhtlinnak siseh, na sungh zatlaknak siseh, silole teima ngai in hmai na kalnak kong siseh, lungdongh in sungh na thaapnak kong siseh chim ve hna, ruah ve hna. An in ngaih piak lai i, na lung um khua nuam dom lai.
12. Na thluachuah sunlawih
A thi mi lakah a nungmi na sinak, ṭamhal in a vak mi lakah a khim mi na sinak, ṭihphannak nih a dolh mi lakah hnangam mi na sinak hna hi fak piin i lawmh pi hna. Cu lawng hlah, bawmh haumi minung an um zungzal: thi in siseh, thil in siseh, chawva in siseh, tha le zaang in siseh, lung le thin in siseh, bawmh khawh zungzal an si.
Nunnak timi cu amah le mah te lawng cun kutke bulmi a si, santlai lomi a si. Sihmanhsehlaw, mi caah thilṭha kan tuah mi nih hin kan mah kan nun lila a dam ter, i mi nun zong a dam ter. Cucu, nunnak sullam a si.
"Rawl lawnglawng hi nunnak a si lo..."---Jesuh Khrih
