Hlan lio pi ah, TThuro bu khat rawl kawl awkah an siangpahrang nih a vaih pi hna. Nikhat cu, caan sau ngai an zuan caah an ba ngaingai. TThuro siangpahrang nih cun hla deuh zuan rih awkah tha a pek hna. TThuro fa cem te kha hmai a sa ii meithei kung tangah facang an i tthentthek ko kha a hmuh. Cun, an dih lakin cu facang cu an va fuh i, an char/ei.
Ruah lo pi bak in sur-rap nih a vun tlak hna. Ramvai pa thingtan he a rat ko zong kha an hmuh. TThuro rual nih cun cu sur-rap chungin luarnak ding ahcun fak piin an thla cu an i zah, nain a zeitihmanh in si kho lo. An siangpahrang nih Ruahnak pakhat a ngeih. TThuro runrual kha hmunkhat te ah kan zapi in, fak piin kan thla kan bengh hna lai i kan zuang hna lai tiah a ti hna. Hmunkhat te riantuan ti ahcun thazaang zong a thawng deuh, tiah a chimh tthan hna.
TThuro rual cu hmunkhat te ah an thla cu an zap tti hna, fak piin an i zuam i, sur-rap cu van lei ah an kai pi duatmat ko. Ramvai pa nih cun a hmuh tik hna ah a lau ngaingai. TThuro an zuannak lei paoh ahcun a tli ve i tthuro pawl cu a zulh hna, nain tlang sang pi in - tlanghram(nelrawn) ah lo diam in an zuang. Khuachung he aa naih ngainak Biakinn pakhat ah an vai din, cu ka cun, TThuro siangpahrang hawi asi mi Zu pakhat, dawtnak ngei ngai mi Zu a rak um.
Zu nih cun TThuro an thlabengh thawng he thang ngai in an rat cu a theih tikah, thuh aa tim. TThuro siangpahrang nih cun nem tein a hei kawh. Cuhnu ah, an thil sining vialte kha a hei chimh. Nangmah bawmh kan herh, kan sur-rap hril vialte hi kan chah piak law kan i lawm tuk ko hnga tiah tthuro siangpahrang nih cun a hei nawl.
Zu nih cun TThuro siangpahrang nawlnak cu a tlinh piak, an sur-rap hril vialte cu a ttei piak dih hna i a chah piak dih hna, cuticun, TThuro runrual cu an luat tthan. An zapi tein Zu cung ahcun an i lawm hringhran. An lunglawmhnak Zu an theihter cio hnu ah an zuang tthan.
Hmuhsakmi: Lungrual tein hmunkhat rian nan ttuan tikah, nan thawng deuh.
