A hlanah tarpa pakhat a rak um i hawikom tampi a ngei. Amah nih varang pakhat a zuat. Cu varang cu phun dang ngaingai asi. Zeicaahtiah nifate in suiti pum khat lengmang a tit tawn. Mi vialte an khuaruah a har dih.
Tarpa cu aa nuam tuk i suiti cu atu le atu a rel lengmang. Thingkuang chungah a chiah i ttha tein tawh a hrenh tawn. Hi ka thinkuang a khah tik hin mirum ka si te lai, tiah saduh a that.
Ni khat cu hitihin khua a ruat. " Ka varang hi ka thah lai a pum chung i a ummi suiti vialte kha ka lak lai i a rauh hlanah mirum bik ka si lai, " a ti. A lung chungin mi dang kha zei ah a rel hna lo.
A varangpi cu a tlaih i a thah. Zokzok in a pum cu a cehu. A chungah suiti pum zeizat remruam dah a um hnga ti nalak ah pumkhat taktak hmanh a rak um lo.
Zeicaaahdah suiti a um hnga lo, tiah khua a ruat. A rauh awk a hngal lo. A hnuah suiti cu duhsah tein aa sem i a tthan hnuah nifate pum khat lengmang tit phung a si ti kha a hngalh.
Atu ceo ah a lung a fiang. Sihmanhsehlaw varang cu cheu dih a si cang i a nung tthan kho ti lo. Ka palh tuk a ti i ngaihchih vai a bar. Varang a nun lio caan a vun ruah tthan tikah tampi a ngaih a chia.
Hi tarpi hi rum zau a duh caah varang kha a sung. Tam tuk duh cu tlawm te hmuhnak a si. Duhfah tuk cu a ttha lo. Nannih zong zei thil paoh cungah nan duh fak tuk hlah u. "A ruh tum hlah a hang na hap lai, " tiah pupa phungthluk ah a um.
Biafang sullam : Vai a bar - zeihmanh a tthahnem ti lo.
