Thinhunnak:
Ngaihthiamnak le zaangfahnak lo cun: vuikhat bengh kan si ah vuihnih in lehrulh; vuikhat kan palh ah vuithumli in biasi phai hnawh; nunnak ahhin zeithil hmanh hi a ning le cang tein a kal kho hrim lo. Mi puarhrang caah Zaangfahnak kan ngei maw?
Anmah nih thil an cuanh ning, an hmuh ning le an duh ning ruahpiak tawn hna usih, zeitlukin a har ko zong ah. Zei dirhmun ahdah an dir? Mihim lo le mihemmi hna an si el maw? Minung tampi nih hin kan him lo ruang le kan mihem lo ruang ahhin caan tampi ahcun lih kan chim tawn. 'A tak' hi kan ṭih tawn, i mah le mah icohlan khawhnak zong kan ngei lo. Cu bantuk minung cu dawt thlawrh in kan dawt hna ahcun, kan zohkhanh hna ning ah kan palh ngaingai--dawt cu dawt phung an si ko, nain, zaangfahnak hi an herh deuh tawnmi a si--zeipaoh nih hin caan hi an ngeih cio:"...I dawt caan, i zaangfah caan..." tbk. Cu caah, hi zawn ahhin cun zaangfahnak pi he kan zohkhanh hna ding, a si.
Zaangfahnak hi kan dirhmun cungah le kan sining cung ahhin hmuh khawh a si tawn. Ka dirhmun a ṭhat lo caah fahnak le harnak tampi ka tong--cu harnak le fahnak hna nih cun: ka inn chungkhar ah siseh, keimah pumpak ah siseh; a lamkip in thinhunnak kha an chuah pi khawh. Cu thinhunnak nih cun mi puarhrang ah a kan chiah tawn. Aw! Cu bantuk dirhmun a dirmi ko nih hin zaangfahnak hi kan herh khun. Mi zeihmanh hi miṭha lo ding le, mi puarhrang ding... ah chuakmi kan um lo. Nun ṭha, nun duhdim ngei ding...cio ah chuakmi kan si. Sihmanhsehlaw, vawlei cung duhtlinlonak ruang ahhin harnak le fahnak hi hrial awk ṭha lo cemmi an si. Puanhrannak te hna, ziachiatnak te hna hi kotho sinak aa ngeihmi an si lo--him lo ruang ah, mihem ruang ah, duhtlin lo ruang...tbk ruang ahhin a cang tawnmi an si. Cucaah, hi bantuk thil sining dirhmun ah kan dir ahcun cu bantuk minung cu zaangfahnak pek zuam hna usih.
Thinhunnak timi hi a cang lengmang mi a si (nithum dan vuikhat tal hi cu ka thinhung lengmang tawn rua...). Hrial khawh si tawn ko lai nain, tei khawh lomi zong a um len ve tawn. Kanmah chungkhar chung lila ah maw, silole, kan hawikom cung ah maw, puanhrannak hi kan hmuh khawh tawn. Cu bantuk hawikom le chungkhar sin nun cu a nuam lo ngaingai. Zeihmah kha siam tling tein hmuh khawh a si ti lo. Kapkhat lei ah, a nuamh lonak a ruang cu zeitin thlopbul ning cang an si ti kan hngalh lo ca zong ah si kho. Nihin ni thok cun, zaangfahnak hmang cang hna usih. Dawt zong dawt ṭhiamṭhiam ding an si ko; nain, zaangfahnak (theihthiamnak) te he nun cawnpi rih hna usih.
Cu zaangfahnak nih, an thin le lung ah hmun a vun lak te lai. Cu tik ahcun damnak an hmuh te ko lai. Kan theih ding bal: vuikhat ka zaangfah, ka ngaihthiam caah za cang seh timi lungput ngei hlah usih; kan si khawh chung in ngaihthiam le zaangah izuam hna usih. Hmailei caan, ni nikhat ahcun: aa daw bikmi chungkhar le aa tlumtla bikmi hawikom zong kan si lai.
