"Thlem Khawh Lomi Zuun"
© Cinraang (Van Ceu Lian)
Nitir zuuntthing thlem khawh loin fahnak hma por;
Nang in philh awkah ka zeidah hlawt in ka vui hnga?
Ka lu maw ka thin vui dingah; ka canh lo nang philh ser,
Kan tuanbia aa hruhpitu, kei, akuai vawlei minung sa:
Duhnak le dawtnak ah caan phawtu, fahnak luahtu,
Dawtnak ram nuam co hlanah, ralram ah akiakmi ka si;
Nang bel, sining thar he thinghnah no tluk corh na cu,
Nang cu na hno, na hngo; kei, lailawn-hri tlukin teumi;
Par na cut ah kei ka kor, leu na timh zongah ka hmun,
Parttha, lairawn-hri cu a nemmi caah cun afek hrim lo
Liam na serhmi serh ve dingah bual thiam loin ka mawn,
Lang loin nang chungah apilmi kei, na zuun ka co;
Caan nih mi a damh chimbia kei ca'hcun lih chimthli,
Caan chungah na zuun in a ngormi ka si.
