Rawl kawl awkah aa thawh tawnmi Zu rual cu, zeitik hmanh ah him tein an kir tthan bal ti lo. Rawl an kawlnak hmun ah, Chizawh nih a rak seh lengmang hna, i cuticun a thah lengmang hna. An nunnak hnga caah rawl an herh ttung tikah, kawl lo ah le a thi tthiamtthiam ding an si, kawl le a thi tthiamtthiam ding an si. Cutiun, vansang chimpit au in an um cio hna.
Nikhat cu, hiti rawl loin kan um luaimai ko ahcun zau kan nguh lai lo hih. Hi Chizawh sinah zeital kan tuah hna awk a si, tiah anmah le anmah sin ahcun biatung a dir.
Zu vialte cu an ikhawm dih hna i tonnak an tuah. An hruaitu pa cu a vun dir i, "Khah! Tutan kan i tonnak a ruang cu, biapi ngai a si tiah nan hngalh cio ko lai--Chizawh sinah zeital tuah hna usih timi ruahnak cheu cio ding kan sawm hna," a vun ti a tthu.
Ho hmanh a thomi le a dirmi an um ti lo ai. Kan i tonnak cu dinhter tthan maw a si ne lai ti an ruah cutmat lio ahcun, an lak i hngakchia nawn te nih a vun i thawh i, "Hi Chizawh sinin luatnak lam kan hmuhnak ding ahhin, lamttha tuk ka theih," a vun ti hna. Adang nih cun, "Vun chim hnik," an vun ti ve, i rem tthiptthep tein a bia an ngaih.
A thawh hna i, "Hi Chizawh hi, a hngawng ahhin korong awih hna usih law, seh a vun kan timh paoh ahhin cu korong cu a awn lai i, kan zam manh ko lai," a vun ti hna. Adang cu heh tiah an lu an su, pakhat le pakhat cu ruahnak ttha bak pei a si hi tiah an ti len.
Cu lio ahcun aw, an hruaitu pa nih cun, "Hi ruahnak hi ruahnak ttha tuk a si nan ti dah caah, hi ruahnak ning in kan kal lai. A si ahcun a ho nih dah, Chizawh hnawng ahcun, cu Korong cu a awih lai--keimah telh loin nan lak in khan ithim uh," a vun ti hna.
Ho hmanh nih tuah kha an ngam ti lo. Chizawh si, a hngawng ah Korong va awih ding si, a kan seh ko lai hen cu--kan duh lo an ti dih cio. Pakhat le pakhat tu kha nangmah ti, nangmah ti an i ti cionak ah an buai ngamsam.
An itonnak cazi ttial pa nih, "Cazi ttial dingah kaa laklawh caah, hitin hin ttial siseh: Tutan kan itonnak ah kan ceihhmaimi cu, ho paoh nih ruahnak ttha a si tiah kan cohlan dih; amah belte, a tuahtu lehlam cu ho hmanh nih kan duh cio," tiah a ti.
Vuvu vengveng in a iu mi Zu rual cu an dai cikcek, i cuticun bia an chah cang caah, zei pipa tuahttuan loin an kir tthan cio.
Hmuhsak: Ruahnak lawng tthat hi a za lo...
