Hlan lio pi ah; khua pakhat ahhin nufa hna ,an um. Pate cu a tlangval cang. A Nu zong cu a tar ngaingai cang. Anpa nih ruah lo piin a thih taak mi hna, a si. Pate, nih cun a si khawh tawk in a Nu kilven le zohkhenh cu aa zuam. Inn chiahru pakhat te an ngei. Cun, an inn kiangkap teah 'Nurse' a ttuan lio mi nu: nungak pakhat a um ve. Pate le a Nu cu sifak an si nain; an lungrethei bal lo. An i daw taktak. Nungaknu te zong nih cun, Pate a nu cu sii-le-ai lei in a thlopbul lengmang ve tawn. Tangka zong liam ter lo sii zong a pek tawn. Cuticun, pehtlaihnak cu duhsah tein an hun tthancho ter. Pate cu, a fel tuk caah le mitoi aa dor tuk caah; ho paoh nih an upat in an dawt. An zawnruah in an hnakkar an tenh. A Nu zong rawl a chumh ter bal lo. Amah nih inn le lo rian aa khinh. A herh mi paohpaoh kha a tuah dih tawn.
An khua cu tlangcung tlakmi khua a si caah ti a har ngaingai nak hmun pakhat asi. "Tikor pakhat" khuapi i bawm in, an ser. Cukacun, ho paoh nih ti i then cio, a si. Artlang in mah caan kha hngah cio i, pakhat a dih khan pakhat va kal kha, a si lengmang.
Nikhat cu, Pate kha ti then ahcun a kal. Minung aa rak tlarmi cu an rak tam ngaingai. Zei hngal lem lo in a vai tlar ve. Nain, vuidang tawn bang; a hmai minung kha a thawn, an i thawn ti lo. Hnulei khan minung tu an rak i chap chin lengmang. "Lungtuai ngai khin, hmai lei ahcun a va panh." "Zeidah cang," ti a vun hal hnik bak ahkhin, tikhor hram ahcun misual pathum an rak to ko cu a hmuh. Pate cu, a thinhung tuk hringhran. "Hmuh bal lomi le theih lomi nih...duh paoh in a kan um hnawh hi," a ti. "Zaangfahnak tein kan thawn piak uh," tiah a nawl hna. Zeihmanh ah an rak rel lo. Khuaci mui ding dirhmun ah an hung dir cang. Pate nih cun, khuami mithmai chiat ai tuarh lo caah; cu misual pawl cu a velh hna i a tthawl hna. Pate a cawlcangh ning hmutu khuami paoh cu an lau dih. Pate cu, a tuahmi thil cungah an thangtthat. Cuticun, ti cu duhsah in an then cio i an ttin.
Vuikhat cu, ruah lo piin a Nu zawtnak a zual! Fak piin a khuh i a khuasik. Pate nih cun, nungak nu cu a rannak in, a vung kawh. Hnawhnam ngaiin caan rau lo teah an hung phan. Nungaknu nih cun, a Nu cu a vun thlopbul caah tlawmpal, a dai deuh. Nain, a Nu damnak ding sii-ai phun kha an khua ah, a um lo. Cucaah, Pate cu, khuapi chung kal ah aa thawh.
Pate cu, an khua cun a vun chuak. An khua ram a chuah lai hrawng khin cun; amah le mah zong fim deuh in a um. Aa ralring. Cun, misual pawl nih cun, an rak dawi zirzir. An ka dawi ti zong, a theih. Nain, a kal lei ahcun zeitin hmanh an ti lo.
Sii-dur he cun tlun cu aa rak thawh. Lam cu misual pawl nih cun an rak kham. Misual pawl nih cun tanbo, namte tbk he an rak dir awnh. Pate nih cun, zei kan ti hnga...Ka Nu zong dam lo; tu hi sii hi ka Nu pek ding, a si. Ka ngaithiam uhlaw, tu vuikhat te hi cu ka zuah ko uh, tiah a nawl hna. Misual pawl nih cun, "Nangmah zaangfah cu zei ah kan i tuah lai," an ti i an velh. Caan sau ngai an i sul len hnu ah, Pate cu tanbo in an tuk. A sii-dur cu lamthang a ril. Misual pawl nih cun; a thi cang, tin ruah caah an kal taak.
Suimilam 1 hnu hrawngah a lung i fimh i, a hung tho. "Sii-dur!!!" a vun ti colh. A vun kawl i thinkung hramah a hei hmuh. A rannak in inn lei ah, a va tli. An inn a va phanh ahcun; "A Nu cu, a rak um ti lo." An inn chung cu thi le hnai he ai ciah. Pate cu, a lungtur a rang i a thinphang. Ka Nu cungah thil pakhat caan sual ti ruat in...
Thidor cu a zulh i lungpang a san ngai nak pakhat, a va phan. Pa rual aw thawng cu kekzuai in a thang.A thli tein a vung bih hna. A Nu cu, thingkung ah an rak hren chih le an rak serhsat kha, a hmuh. Arsa an ei cia mi ruh le rang hna an tuh. An cil an chak hnawh. Pate cu, a thinhung bak a celh in a celh lo. Chak in a pel hna i; rang taktak in thingtan he he a zuan hnawh hna. Misual pawl cu, fak in a tuk-velh hna. An hruaitu pa pakhat cu thinkung ah a ttem i; a Nu an serhsat ning te khan, a serhsat ter ve hna. An ttih lung in..."An bawipa cu an serhsat...ngaithiam an hal pah...an serhsat pah..."
Cu hnuah, Pate nih cun, a thlah i a kal ter. Cu pa cu, a thin a celh ve hrim lo. Pate nih cun, na duhmi um ahcun na hal awk, a si. Mi nunnak tiang harnak le fahnak pekin, thil na tuah awk a si lo, tiah a ti. Cun, "Ka hmette in tu tiang ahhin; hi bantuk thil ka ton hi voikhat lawng a si rih. Cun, nangmah hi cu ka vuikhat le vuikhatnak cu na si tiah, a ti. Cu pa cu khuapi in an thangchiat. A ningzak tuk hringhran. Pate nih cun, kal nak nawl a pek nain; kal nak hlei a thei lo. A tuah cia mi thil hna nih an nanh. Cucaah, "Lungpang cung in a zuang i a thi.
Hmuhsakmi : TThhatlonak, mi lawmh lomi thil, mi duh lomi thil, hramhram in tuah hi ningzahnak le mah le mah i hloh tiang petu thil ah an cang len tawn. Na duhmi um cun, hal ko. Pek awk na tthat cun pek si ko lai. Fir hlah!
