Duh a tlin lo nak hi Vawlei cung ah hin, tinhmi a tam liangluang ko. Co duhmi a tam liangluang ko, duhmi a tam liangluang ko nain Co khawh taktak mi cu a tlawm te. Ruahnak bang in thil a kal lo caan a tampi, Ruahning loin thil ton sualmi a tam pi. Minung nunnak in tahchunh ahcun,duhtu kan ngei,huatu kan ngei,duhmi kan ngei, huatmi kan ngei, ttanhtu kan ngei,ttanhmi kan ngei.
Hmuh bal lomi Minung he kan zeizong te aa kalh dih. Kan i neihniam mi hna he cun kan lungput;kan khuaruah ning tiang zong in kan i khat ko. Duhmi pakhat kan ngeih ah,zei bantuk minung a si zong hngal loin, zei bantuk ziaza a ngeih zong hngal loin, mah le mah lawng zawn aa ruat mi si le si lo hngal loin,miphun,khuami caah santlai mi asi hngal loin, cu kan duhmi minung cu kan hnak ah kan tanh i,zan ih merem loin a kong cu kan ruat tawn.
Cu kan duh mi nih cun an kan duh ve nak ding caah,thil a phunphun in kan i tahchunh tawn. Tahchunh nak: Mifim si ning law,mirum sining law, muidawh si ning law, cathiam si ning law, mi ding si ning law, a ka duh ve hnga maw ti-in khua kan ruat i, kan kut te cu kan cal cung ah kan chuan ruangmang. Kan Duh lomi pakhat kha a kong ruah zong kan huam lo,zei bantuk minung dah asi i, zei bantuk fimthiam nak dah aa ngeih i, zei bantuk lungput dah a ngeih le miphun,khua le ram,inn chungkhar, u le nau caah bochan awk tlak asi zong kha kan thei ti lo.Chim duh mi cu,minung pakhat lawng khuaruah nak cu hawi tampi he i funtom i khuaruah mi nak cun hmai lei caah lai a rel kho deuh lai lo ti nak asi. Phundang in cun;mah duh nak lawng tuah duh le zulh duh nak lungthin ngeih ah cun tlau a fawi te ti nak zong si ko hnga.
