Duh a nung i umtu thut zia thiam mi, mi chonh biak zong thiam i a nunzia Vapual hluan mi. "Ai dawh, ai rem" timi cafang pawl i an Siangpahrang Nu: hmur thlum annkaa ttha ngei i, cu a thlum mi na ann kaa ah tho kho ti lo in a tlu mi vaal zeimawzat lak ah; santlai lo bik cem nih na sin ah thawnghal nak le, na sin ah rak phuan ngam lo mi pawl, thinlung zong nih a zawi khawh ti lo i a nak mi(Guiness) hrai thum-li din piak hmanh ah na sin luang ngam loin hawikom sin lawng ah a zuut mi biathli pawl hun phuan ta ka duh. Ka biahmaithi sau tuk sual, Cer Te nih a dam ko a ka ti caah “na dam maw?”kan ti ti la loh.
Hmun dangdang um hnu lawng I lungchung bia phuan cu Pasal rian si loh na ti men hnga!!! Za Iap te Hnok Cin te dangnaal rual pawl nih ni fatin na hna hram ah um thiam loin an chim an rel mi nak cun hi catlap chung biafang pawl hi sullam thuk deuh ko lai dah!!!
Dawtmi biazai khi a tial cu chim lo a rel zia hmanh ka thiam lo ka rak ti mi kha tu cu ttial hram ka hun thok (phot) ve cang. Ka lu le chantling ai tongh sin vawlei he chikkhat ai tthen colh tawnmi ka pum, nang kong ruat in fingrei ka cah hi kan I then ni khan tu ni tiang ti ninglaw bia na thiam na ka ti men hnga; a tam cang. A si fingrei ka cah a tam cang. Love Song an hun sak, an mitthli hna a vun luan ah khin ka rak capo tawn hna kha, tu kei hoi hna cu ka sak hlan Guitar ka vun lak bak khin ka hnarno ruh a ka tam, ka thaw a ka phih le cu ti cun sak thai loin ka baan than lengmang.
Kan duh na ka ti lo mi hmanh hi tluk ka tuar va si kaw, kan duh na timi rak si ning law zei ton hme ka ton hnga ti ka ruah hmanh ah khin thi kai ngei kan ti cu mit a maw le lung a mit ziahmah. A ngaingai ti ahcun I then te ding hi tuan pi khan rak hngalh si cang, thinlung mitthlam cuan hram nai thok ah khan fak tuk in ka tuar sual lai ti phan ah chikkhat cu ka rak in hrial nain thuk chin le kau chin lengmang in thinlung ah hmunhma na hung la I zeitluk le zeitiang tuar te ding hngalh lomi na zuun tuar hram cu ka rak I thok. Caan sau cang ko hmanh seh, na thinlung cu chim lo, na thluak in nai cinken mi pawl hmanh ah khin I tel ti hlah hmanh ning, zuun ngaih nak phur mi hi catlap na vun rel dih sin “aw!!! A mah kha maw si” tiah khuaruah har nawn, lau nawn khin na hun hlam mi tal khi cu rak si ve ning mu. “Then” nak hi rak um hlah sehlaw “ton than caan” zong hi a sunglawi hnga loh an ti bang “zuun ngaih nak” hi rak um hlah sehlaw ka caah na rak sunglawi tuk hnga loh mu!!! Hi ti ka tial tik ah velhle thiam ngai khin ka thinlung na ka khuai ruangah ka tuar ti duh nak si loin, nang nih cun na hawikom tha phakhat ceo maw, chuahsem pi na ta pakhat bantuk in zeipoh lung thiang tein na chim, na phuang ko, na thu na dir ko. Sihmanhsehlaw lungkil in an uai pi tu kei hrang ahcun na mirh zung khat ah ka rak molh I, na bia kaa khat ah lung fim loin ka rak tlu ril dakaw. Duh le duh ai then mi zuun tuar maw fak deuh hnga hraapkhat dawtu kei zuun tuar nak dah ti cuai ka thlai ah khin mi zei hmanh keimah tluk cun an tuar lai lo dah!!!
Ruahchan nak cu na ka pe lo nain ruahchan nak pakhat ka ngeih mi cu, phungthluk ah “na tuh bang na zuun lai” ti si, duh dawtnak ka tuh ruang ah duh dawtnak ka zuun hrimhrim lai, cu ruang zongah cun daw Cungzing sin ah ton than lai nak ka nawl peng cu. Hi catlap cungah a hung luang mi kan ngaih nak biatlang pawl hi hmurkaa in phuan mi tluk cun thil ti khawh nak ngei hlah hmanh seh a hmaan mi le a dik mi kan duh dawtnak ruangah na thinlung chung ah hmunhma pakhat maw, si lo ah zawnruah nak maw um hrimhrim lai ti zumhnak ka ngei. Zei si poh ah “kan ngai tuk” ti hi vun nolh than rih ning. Ka cakuat sau tuk sual, na rel huam lo le rak I hne te, nai hneek huam lo si zong le rak I hne ko. Nang he ton than lai nak ah khua can rel in kum(1) ah thla (6) lawng um seh ti a duh mipa, thlakhat ah ni (15) laawng um rih seh ti a duh mi minung, Ni (1) ah suimilam (12) nak tam lo um seh ti a duh rih mi luakchuak mi nung….. Natta
